انا بجد اسفه اني مش بكتب ولا بتابع زي الاول
بس انا نفسيا مش متظبطه
دماغي مافيهاش اي شئ ممكن احسه واكتبه
انا نفسي مستغربه روحي
مش زي الاول
مش عايزه افتح الكمبيوتر
ولا عايزه افتح المدونه ولا اتابع
يومي شكله بقي غريب
بقالي شهرين بصحي اروح المستشفي وافضل فيها لحد ماحس بالتعب ارجع البيت انام واصحي تاني يوم علشان اكرر نفس السيناريو
بفتح الجهاز بالصدفه
مش حاسه اني عايزه اقرا ولا اكتب ولا اسمع
النت اللي لو كان فصل كام ساعه كنت احس بفراغ دلوقتي بقالي شهور بعيده عنه
اخبار الكوره والاهلي اللي كنت بتابعها ثانيه بثانيه بقيت بسمعها بالصدفه
حاجات كتير كنت بحبها دلوقتي مش حساها
بتيجي عليا اوقات لا عايزه اسمع صوت ولا اكلم ولا اشوف حد
بقيت برتاح لوحدي اكتر من وجودي في وسط الناس
يمكن لاني بقيت بخاف من الناس
بشك في كل كلمه وصوت وضحكه
من الاخر مش طايقه روحي
انا عارفه ان اللي انا فيه ده مش كويس
بس اكيد ظروف وتعدي
انا مش نسياكوا والله وواحشني التدوين وعايزه اكتب بس مش عارفه
انا هاسيب المدونه مفتوحه لاني اكيد هاكتب في يوم من الايام
بس بجد ماحدش يزعل مني
Falling hearts Here
25 comments:
اخيرااااااااااا
الغلبانه
نورت
مجرد اكتئاب ويعدى
صدقينى حصل لى الموقف دا
وبيحصل كتير
دا بقى يا عاشقه خوف من المستقبل
واحساس بالمسئوليه
ودا شئ جميل بس متعب قوى
ربنا معاكى يا عاشقه
ومعانا
اللى انا فيه دا محدش فيه
بس حاولى تغيرى جو شويه يوم اجازه تحققى فيه كل اللى تتمنيه
ان شاء الله ترجعلنا تانى
بدمك الخفيف وكلامك اللى كله مهدئات وكيتوفان
وفلاجيل
تحياتى يا دوك
بسم الله نبدأ
احنا صحيح مش متعودين منك على كدا وممكن نقولك فترة وهتعدى بس انا مش هقولك الا انتى فى ايدك تغيرى حالتك واوعى تعتبريها فترة وهتعدى واذا كنتى بتحبى تقعدى لوحدك دلوقتى لازم تعرفى ان الناس اتخلقت ميقدروش يستغنوا عن بعض ومفيش حاجة اسمها بتخافى من الناس دى اسالى نفسك كل الناس دى عايشة ازاى
يمكن الحالة دى تكون حالة لا وعى يعنى بتعملى الروتين دا وانتى بتقولى عادى وخلاص بس انتى كمان تقدرى تقولى لا انا مش عايزة اكون كدا انا عايزة اعمل تغيير اخرج اروح اى مكان التغيير يبقى من كل حاجة من الشوارع اللى بتمشى فيها تعاملك مع الناس اعملى شخصيتك اللى انتى عايزاه مش اللى المجتمع عايزها يمكن الحالة دى جتلك فرصة تصححى بيها حاجة معينة فى حياتك مثلا استغليها صح بقى واعرفى ان ربنا دايما موجود معانا وكل اللى بيجيبه ربنا اكيد اكيد حير
طولت عليكى يادكتورة بس انتى غالية علينا وتقبلى شوية الكلام دول بقى من اخوكى الصغير
وان شاء الله نشوفك قريب بشخصية جديدة
انتى حباها ومستمتعة بالحياة عن طريقها
مش عارفه اقولك ايه غير اني بمر بنفس الحاله وماعنديش حل
بس لعلمك المدونه خليها الحاجه الوحيده الي معاكي انا بعمل كده الحاجه الي بتنفس فيها
كل شيء بيعدي بمرور الوقت
اعطي نفسك فرصة واخرجي وغيرى جو وشوفى اصحابك وبكرة كله هيكون تمام إن شاء الله
الف سلامه علييكي يادكتورة
والله ده موسم الكل كده
حاولي تكسري الروتين شويه
ربنا يكون ف عونك
مستنيينك
وحشتينى جدا جدا جدا
كنت فاكرة ان الاكتئاب هيقعد شوية معاكى ويمشى فترة وتعدى بس كدا طول اوى
حاولىتين مش تستسلمى لية
انتى ادرى بظروفك بس حاولى تغيرى شئ فى حياتك تعملى شئ بتحبية اوى لسة احساسك بية معاكى يمكن تكونى افضل بس اهم شئ مش تستسلمى للروتين والاكتئاب
تقبلى مرورى
ياعاشقه دايما فكرى نفسك انك فى نعمه واحمدى ربنا على كل حاجه انتى فيها
ربنايكرمك وجزاك الله خيرا كثيرا وربنا يفرج كربك وهمك
وبجد بكره احلى
ع فكرة والله مجرد حاله
حاله و بتعدى و بتخلص يا دوك
بس انا زعلان انى بعتلك ايميل اطمن عليكى فيه و انتى نفضتى ... بس سماح المره دى
بتحصل و الله المواقف دى كتير
بصى متفكريش فى أى حاجة..فكرى بس إيه اللى حيريحك فى الفترة دى و اعمليه و ارمى كل حاجة وراكى
و إن شاء الله ترجعى تلاقينا مستنينك
ايه يا بنتى كل دا؟؟؟؟
الله يخرب بيت الإمتياز وسنينه
صباح الفل
معلش ستيتة متأخرة كعادتها اليومين دول
وده لأني انا شخصيا عندي نفس اللي عندك وعند غيرك
حالة من اللاشعور المصحوب بلا مبالاة مرضية مع اعراض اكتئاب خفافي
لكن يا حبي لو مكنتيش تيجي تفضفضي فينا ها تفضفضي في مين
اهو انا كل ما الاقي نفسي زهقانة وقرفانة اشك شعب المدونات بوست يضحكهم واضحك انا كمان معاهم
اماااااااااااااال
الشعب لبعضه
ربنا يفرجها عليك وتنوري تاني يا احلى اهلاوية
السلام عليكم
معلش هي حالة و بتعدي
كل اللي اعرفهم عانوا من الحالة دي
و انا شخصيا كنت كده
حاولي تلاقي حد تشكيله او تتكلمي معاه
صدقيني هتفرق معاكي كتير قوي
ان شاء الله الحالة تعدي
تحياتي
والله انتى كمان وحشتينا قوي
بس سيبك من الاكتئاب وسنينة واللى يضايقك ولا يهمك منه
متغيبيش تانى كتير كده يا قمر
دي حالة اكتئاب واضحة التشخيص يا دكتورة. في طريفتين للعلاج... واحدة منهم تاخدي بروزاك
Prozac
ماعرفش في مصر اسمه التجاري ايه. و ده ثاني دواء حقق اكبر مبيعات في التاريخ الامريكي. تعرفي ايه هو الدواء رقم واحد ؟
:D )))
اسم الله عليكي.. ما انت شاطرة اهه
اما الطريقة الثانية انك تنتهزي اي فرصة و تروحي علي قسم الاطفال و تقضي بعض الوقت مع الاطفال المرضي و يا حبدا لو جيبتيلهم حاجات بسيطة كدة تفرحهم. ده بقي علاج اكيد لحالات الاكتئاب
يا رب تكوني بقيتي أحسن
أنا قلت آجي اطمئن عليكي
يال بقى اتحفينا ببوست جديد
ربنا يريح بالك
الاخت /الدكتورة الاهلاوية
اولا : من الاخر انت بحاجة لعمل تغيير ما ... اجازة ... سفرية ... انشا الله تكون خناقة ... لكن لا تتركي نفسك في تلك الدوامة تسحبك شيئا فشيئا
ثانيا : لا اعلم لماذ يخلط الجميع في تعليقاتهم بين الاعراض الاكتئابية ... والا كتئاب ... الاعراض الاكتئابية ... هي اعراض مرتبطة بالكرب النفسي من بعض مظاهر الحزن وما الي ذلك والتي قد تذهب من تلقاء نفسها او بتغيير علي مستوي الظروف المحيطة ... اما الاكتئاب - والعياذ بالله - فهو تغيير في مستوي الهرمونات العقلية ...مما يستدعي تدخلا علاجيا بمضادات الاكتئاب .... حفظنا الله واياكم من كل سوء ... لذا فقط نرجو الانتباه في التفرقة بينهما
ثالثا : مررت - وومازلت ولكن بدرجة اقل - بنفس الاعراض ... وإن كانت الاسباب مختلفة ... ولي بوست علي مدونتي تحت اسم " اعراض اكتئابية " ارجو ان تقومي بقرائته ... لتعلمي ان حضرتك ... رغم كل شئ محظوظة ... فانت تعانين من تلك الاعراض ... وانت موجودة في بلدك ووسط اهلك واحبائك ... فما بالك بمن يعانيها ... وهو بمفرده في الغربة ... حفظ الله علي الجميع سعادتهم واحبائهم
ننتظر تدويناتك القادمة ... لتحكي لنا كيف تغلبت علي تلك الحالة - باذن الله ومشيئته - ... وانك صرت احسن حالا.... شكرا والسلام عليكم
الف سلامه
ليه الاكتئاب بس
على العموم ممكن يكن فتره راحه لبدايه جميله بأذن الله
وأصيكي بقراءه سوره يوسف
عادي على فكرة
الفترات دي بتعدي على كل الناس .. بتبقى حالة مودية وتروح لحالها
وممكن تتمرر تاني برضه
كله عادي
ربنا معاكى يا حبيبتى
Post a Comment